O CPXG propón que xornalistas en paro impartan obradoiros nas escolas

O decano do Colexio Profesional de Xornalistas de Galicia, Francisco González Sarria, e o representante da demarcación de Santiago Xaime Leiro reuníronse co alcalde de Santiago de Compostela, Martiño Noriega. Na xuntanza, estudouse a posibilidade de accións conxuntas como o desenvolvemento de obradoiros de xornalismo nas escolas, a realizar por profesionais desempregados, e a posta en marcha dunhas xornadas sobre publicidade institucional.

O Colexio Profesional de Xornalistas de Galicia trasladou ao alcalde de Santiago, Martiño Noriega, a posibilidade de desenvolver un programa de obradoiros nos colexios públicos da capital de Galicia a realizar por xornalistas desempregados. O rexidor compostelán foi receptivo a esta proposta, que estudará en breve o equipo de goberno.

Ambas as dúas institucións manifestaron o seu interese en promover neste 2016 unhas xornadas sobre publicidade institucional. A Xunta de Goberno do CPXG e o alcalde de Santiago comprometéronse a manter un novo encontro á volta do verán para afondar nestas e noutras propostas.

A xuntanza serviu tamén para presentar a nova Xunta de Goberno do Colexio de Xornalistas e o intercambio de reflexións sobre o exercicio da profesión.