Os encoros de abastecemento da demarcación Galicia-Costa atópanse case ao 99 por cento da súa ocupación total

Así se recolle no último boletín hidrolóxico no que se sinalan os datos da evolución dos recursos hídricos desta Demarcación, e se indica que os 19 encoros de Galicia-Costa contan cun volume de auga encorada de 628,86 Hm3, do volume total de 690,15.

As presas de abastecemento de Forcadas e Beche atópanse ao 100 por cento da súa ocupación; mentres que as de Cecebre, Eiras, Zamáns, e Baiona superan a media de ocupación dos encoros de abastecemento, e o encoro de Vilagarcía (48,02 por cento) é o que presenta a menor porcentaxe de volume encorado.

No que se refire ás bacías destinadas ao consumo hidroeléctrico, o encoro do Eume é o que presenta o maior porcentaxe de ocupación, cun 96,46 por cento. Comparando a situación actual cos niveis que se rexistraban o pasado ano, o volume dos encoros sitúase un 19,04 por cento por riba, xa que o 25 de xuño de 2017 estaban ao 71,29 por cento.