Galicia celebra a poesía entre os próximos 18 e o 21 de marzo co festival 'Alguén que respira!'

A terceira edición do Alguén que respira! chega carregada de novidades, entre elas o feito de que este ano, por vez primeira, algúns dos actos do festival se celebren fóra do Teatro Principal, sede principal do evento. De feito, a programación do denominado Respira! Out será a que inicie os recitais o día 18 de marzo na Casa do Taberneiro, cunha sesión especial de regueifa na que participan Manolo de Burela, Olalla da Prica, Lupe Blanco e Josinho da Teixeira.

Ata cinco estreas poderán verse ao longo dos catro días deste festival organizado pola Concellería de Cultura de Santiago de Compostela coa colaboración da Secretaría Xeral de Política Lingüística da Xunta de Galicia.

A elaboración dun programa propio foi un dos sinais de identidade do Alguén que respira! nas dúas primeiras convocatorias e nesa liña, este ano programouse unha ambiciosa rede de propostas realizadas expresamente para o Teatro Principal, ademais doutros espectáculos que chegan por primeira vez a Galicia, como é o caso da peza de Miguel Azguime con Salt itinery. Poetas, instrumentistas, compositores e compositoras, actores, performers ou videocreadoras ofrécennos os seus traballos de hibridación artística, indagando en linguaxes propias e alleas, arriscándose coa palabra ou co silencio, co ruído ou coa voz, pero sempre en contacto coa indicible condición de asombro e estrañeza que contén a poesía.

Entre as estreas, figuran a de Rompente, co seu espectáculo Que hostia din os rumorosos? ou Mercedes Peón, que se aliou con María Reimóndez para facer Linguas elementais. Ademais deles, desenvolverase o día 19 unha unha proposta singular, proxectada para o festival e realizada polo seu equipo artístico. Na dirección Antón Lopo e Baltasar Patiño na iluminación. A documentación foi de Séchu Sende e o espazo sonoro un deseño de Ana Romaní e Chus
Silva. Sobre o escenario do Teatro Principal, corpos construídos a si mesmos como ámbitos literarios.

Poesía de radical fisicidade, con versos de Manuel Antonio ou de Cunqueiro, que os visitantes poderán ler escritos sobre un soporte insólito: a pel.

Tamén poderá verse por vez primeira Sentadas na beira do escenario cos pés colgados, unha proposta de Celso Fernández Sanmartín que supón o seu regreso á linguaxe poética. A esta peza, que poderá verse o venres ás oito da tarde, súmase a homenaxe que o festival lle rende ao poeta Francisco Cortegoso a través de Je vous salue, Fran Cortegoso, realizada por Pablo Fidalgo.

Polos diferentes espazos do festival poderán escoitarse e verse a case cincuenta poetas, algunhas delas inéditas en Galicia como é o caso da navarra Beatriz Chivite ou do sempre polémico creador portugués Antonio Barahona, que en Compostela ofrecerá unha das escasas oportunidades que houbo nas últimas décadas para coñecer en directo os seus poemas.

Entre os nomes incluídos no programa, figuran Manuel Rivas, María Sánchez, Chus Pato, Pol Guasch, André Targa, Blanca Llum, Lara López, María Lado, Rafa Lobelle, Carlos Quiroga, Lupita ! 3Hard, David Trashumante, Charo Lopes ou Xosé María Álvarez Cáccamo.