A UDC colabora no curso de verán internacional 'Moving Boundaries: Human Sciencies and the Future of Architecture'

Este prestixioso curso, organizado pola arquitecta Tatiana Berger e o científico Sergei Gepshtein de Estados Unidos, conta coa colaboración da Escola Técnica Superior de Arquitectura da Coruña. O curso reúne a máis de 26 distinguidos relatores internacionais, incluídos os arquitectos Álvaro Siza Vieira e Rick Joy, o historiador da arquitectura William JR Curtis, os arquitectos e teóricos Juhani Pallasmaa, Alberto Pérez-Gómez e Harry Mallgrave, os neurocientíficos David Kirsh e Kate Jeffery, os autores máis vendidos Sarah Williams Goldhagen, Sarah Robinson e moitos máis entre os que está o profesor da ETSA da UDC, Fernando Agrasar.

Sesenta participantes de 18 países diferentes, incluídos arquitectos e estudantes de Arquitectura da UDC, deseñadores e psicólogos ambientais, uniranse ao curso durante as dúas semanas de duración do mesmo. Tanto organizadores como relatores colaborarán en conferencias e mesas redondas para iluminar múltiples facetas relacionadas co impacto da contorna construída na saúde e o benestar do ser humano. As atmosferas únicas de Galicia, Matosinhos, O Porto e a rexión de Minho, brindarán unha ampla oportunidade para investigar como os impactos da contorna construída deixan pegada na cultura local. O curso contará con conferencias, mesas redondas, leccións de debuxo, numerosos percorridos, excursións e talleres, nos que os participantes descubrirán o rico patrimonio cultural das rexións locais, ilustrando así as relacións sustentables e resilientes da persoa, a comunidade e o lugar. Ademais da súa arquitectura inspiradora, estas rexións a ambos os dous lados da fronteira entre Portugal e España son ben coñecidas polas súas distintivas tradicións artesanais vernáculas, lingüísticas, musicais e culinarias.

Os temas do curso exploran: “o fenómeno do lugar”, “a dinámica da experiencia”, “o mundo dos sentidos e a percepción” e “a emoción na arquitectura, a planificación urbana e o deseño”. O programa brindará a cada participante numerosas oportunidades de interacción con algunhas das mellores mentes en arquitectura, deseño urbano e ciencia. Aprenderán xuntos, uns doutros e da contorna única deste curso, gañando a forza para transformar a educación e a práctica arquitectónica en todo o mundo.

Sobre Moving Boundaries

Os edificios, veciñanzas e cidades impactan directamente na saúde e no benestar. Esta premisa apréciase cada vez máis en toda a gama de profesións involucrados no deseño e mantemento do espazo arquitectónico. Ao mesmo tempo, sábese pouco de como funciona en detalle a relación entre as persoas e as contornas: como exactamente a nosa experiencia, comportamento, emocións e interacción na comunidade están moldeados pola contorna construída.

Reuniuse a varias disciplinas científicas para axudar a encher este baleiro, incluíndo as disciplinas agrupadas baixo o paraugas da neurociencia e a ciencia cognitiva. Os encontros de científicos e profesionais do deseño teñen como resultado a aparición dunha nova e emocionante liña de coñecemento humano, que conduce a unha inédita interpretación das funcións e responsabilidades do deseñador.

Moving Boundaries é unha colaboración internacional e interdisciplinar que busca difundir este novo entendemento a través da educación, a investigación e a práctica. O motor desta orixinal iniciativa baséase na interrelación das disciplinas científicas mencionadas anteriormente e as disciplinas de deseño como a arquitectura, a planificación urbana, a arquitectura paisaxista e o deseño de interiores. Con sede en San Diego e La Jolla, California, fogar da venerable Academia de Neurociencia para a Arquitectura (ANFA), e conectada por unha rede activa de colaboracións con escolas de deseño afíns de todo o mundo, Moving Boundaries está preparada para crear unha comunidade de estudantes, profesionais e diferentes organizacións que comparten a mesma visión, misión e valores.

Nas súas máis altas aspiracións, Moving Boundaries está deseñada para servir como plataforma de colaboración entre educadores e científicos, profesionais e estudantes de arquitectura, así como con institucións de deseño, investigación e aprendizaxe. A iniciativa está motivada por ideas e creacións de arquitectos tan notables como Richard Neutra, Frank Lloyd Wright, Alvaro Siza Vieira, Louis Kahn, Alvar Aalto, Carlo Scarpa, Luís Barragan, Balkrishna Doshi e Juhani Pallasmaa, como tamén de pensadores innovadores como Maurice Merleau-Ponty en Francia e John Dewey en Estados Unidos. O legado colectivo destes individuos esixe que o deseño se vexa desde unha perspectiva humanista, comprometida co florecemento persoal e centrada na saúde física e o benestar psicolóxico do individuo.