O presidente da Xunta aposta por unha televisión e unha radio públicas de alta calidade, altamente comprometidas co futuro de Galicia, coa liberdade, o pluralismo e a tolerancia

O presidente da Xunta de Galicia, Emilio Pérez Touriño, afirmou que o compromiso da Compañía de Radio e Televisión de Galicia (CRTVG) “ten que ser o dun futuro de liberdade e pluralismo, á altura das circunstancias do cambio decidido polos cidadáns o 19 de xuño”. “O noso afán é facer unha televisión e unha radio de alta calidade, altamente comprometidas co futuro de Galicia, coa liberdade, o pluralismo e a tolerancia”, explicou o presidente, no acto da toma de posesión do novo director da CRTVG, Benigno Sánchez García.

O xefe do Executivo autonómico argumentou que “un país só se pode construír cun exercicio permanente dos valores cívicos e constitucionais de información veraz, plural, e de capacidade de crear un proxecto colectivo de confianza nas forzas que ten o país”. Neste sentido, indicou que a CRTVG precisa “dun paso adiante entre todos para mellorar a súa credibilidade”, unha misión que “só se pode conseguir cun esforzo cotiá e colectivo para garantir a transparencia”, unha cuestión que considera “o eixo vertebral da política do cambio”.


“Tamén a CRTVG vai facer ese exercicio cotiá de transparencia na información, que pasa por dar cabida a todas as voces, a esa inmensa pluralidade que hai no noso país, para que ningunha voz quede excluída”, asegurou.

Tres obxectivos principais

Pola súa banda, inmediatamente despois de tomar posesión do seu novo cargo, Benigno Sánchez García resumiu os tres obxectivos que se marca á fronte da xestión da compañía. En primeiro lugar, quere que a CRTVG “conecte coa realidade plural e diversa do país, no que hai moitas Galicias diferentes que teñen que ter a súa canle de expresión”. Cualificou este compromiso coma un “obxectivo fundamental” no que traballará sempre “con criterio de calidade e dignidade profesional”.

En segundo lugar, o novo director da CRTVG fixo fincapé na necesidade de que nos medios públicos “non caiba a propaganda”, de xeito que se garanta o “dereito fundamental a unha información veraz, e ao pluralismo político e ideolóxico”. Por último, manifestou a súa vontade de que tanto a radio como a televisión conten con espazos culturais nos que a cultura e a lingua de Galicia teñan un “lugar natural de espallamento e normalización”.

Benigno Sánchez recoñeceu que se trata dunha “tarefa difícil”, para a que buscará “o consenso entre todas as persoas, institucións e organismos” relacionados co labor da compañía, así como cos representantes legais dos traballadores. Asemade, anunciou que fará “unha aposta firme por unha política laboral de portas abertas”, baseada no consenso e no diálogo, de tal maneira que “non se despida a ningún talento por cuestións alleas á súa profesionalidade”.

Benigno Sánchez accedeu por oposición en 1995, co número 1 da súa promoción, ao corpo superior de inspectores de Traballo e Seguridade Social, con destino inicial en Vigo. En 1988 incorporouse á empresa Construcciones Aeronáuticas, S.A. (CASA) como subdirector executivo da Dirección de Organización e Recursos Humanos.

En 1991 foi nomeado presidente do Consello Galego de Relacións Laborais, cargo que desenvolveu durante seis anos. Posteriormente, integrouse no grupo empresarial Leyma-La Lactaria Española, S.A. como director de Organización e Recursos Humanos.

En 2000 foi nomeado xefe da Inspección Provincial de Traballo e Seguridade Social da Coruña, cargo que desenvolveu ata o de agora. É conferenciante habitual sobre cuestións laborais, sociais e da empresa en xeral, en foros universitarios e profesionais, e ten numerosas publicacións sobre os temas da súa especialidade.