Francisco Varela gaña o Premio ao Mellor Artigo Xornalístico sobre o Sector Naval, convocado polo CPXG e o Colexio de Enxeñeiros Navais

O xornalista Francisco Varela é o gañador da I edición do 'Premio ao mellor Artigo Xornalístico sobre o Sector Naval', convocado polo Colexio Profesional de Xornalistas de Galicia (CPXG) e pola delegación en Galicia do Colexio Oficial de Enxeñeiros Navais e Oceánicos (COIN). O xurado escolleu por unanimidade o artigo 'Seguridade primeiro, logo traballar', que Varela publicou en La Voz de Galicia o 14 de maio de 2005. A entrega do premio celébrase o venres, 1 de decembro, no Clube Financeiro de Vigo, a partir das 19.00. O acto está presidido pola Directora Xeral de Promoción Industrial e da Sociedade da Información, María Elena Veiguela Martínez.

O xurado do premio escolleu como finalistas, ademais do artigo galardoado, os textos 'A Politécnica Superior deseña un sistema de estabilización de pesqueiros' (publicado en La Voz de Galicia o 9 de outubro de 2005), tamén de Francisco Varela; e 'Os estaleiros do mundo, saturados' ('Los astilleros del mundo, saturados', publicado no suplemento económico Euro, do Atlántico Diario, o 6 de agosto de 2006), de Ana Fuentes.

Francisco Varela foi escollido por unanimidade por un xurado nomeado polos dous colexios profesionais que convocaron o galardón. Foron membros Manuela Fraguela Seoane, Subdirectora de Promoción Industrial e Comercio Exterior; Xosé Manuel Vega Gómez, decano do CPXG; Antón Luaces Teixido, vice decano do CPXG; Guillermo Gefaell Chamochín, decano territorial do COIN; e Alfonso García Ascaso, vice decano territorial do COIN.

Este galardón é o primeiro froito de un convenio de colaboración asinado polo Colexio de Xornalistas e o de Enxeñeiros Navais aproveitando os aspectos de carácter social e público que comparten. O 'Premio ao mellor Artigo Xornalístico sobre o Sector Naval' conta cunha dotación económica de 2.000 euros e ten como intención recoñecer e difundir o traballo xornalístico que mellor analice o sector naval.