Importante presenza galega na Convención Internacional de TV e Radiodifusión de Amsterdam

O director xeral de Comunicación Audiovisual ven de participar en representación da Secretaría Xeral de Comunicación da Xunta de Galicia na International Broadcasting Convention (IBC), que se celebrou entre o 12 e o 16 de setembro en Amsterdam (Países Baixos). Esta feira de telecomunicacións e audiovisual, a mais importante do mundo xunto co NAB de Las Vegas que se celebra na cidade norteamericana en primavera, reúne a mais de 45.000 profesionais de todo o mundo e recolle os últimos avances nos eidos da telecomunicación e radiodifusión, a xestión audiovisual, e a creación de contidos para televisión e os medios audiovisuais de nova xeración. Este ano máis de 1.300 empresas de todo o mundo amosaron as tecnoloxías máis recentes e as ideas de negocio máis orixinais no mundo da difusión audiovisual e os novos medios.

Na presente edición a convención contou coa presenza dunha importante delegación do sector das telecomunicacións, audiovisual e multimedia galegos, con representacións do máximo nivel de empresas como o operador público Retegal, os fabricantes Televés, Egatel e Itelsis, os dous últimos cun stand propio, e membros do Clúster Audiovisual Galego como a Compañía de Radiotelevisión de Galicia, Arantia, Cinemar Films, Continental, CTV, Ficción Producciones, Filmanova, Isabella Audiovisual, Lambda Stream, Spica, Tecnocom, e Voz Audiovisual.

Tecnoloxía galega

As empresas Egatel e Itelsis incluíron entre os equipos de difusión de televisión dixital desprazados a Amsterdam exemplares dos gapfillers ou encheocos instalados no plan piloto de despregue da TDT que a Secretaría Xeral de Comunicación e o operador público Retegal S.A. levaron a cabo no concello lugués da Fonsagrada. Estes equipos constitúen unha solución pioneira a nivel mundial desenvolvida integramente en Galicia, solución que está a ter unha importante repercusión internacional, como amosa a boa acollida que estes equipos tiveron nesta mostra.

Tanto o director xeral de Comunicación Audiovisual como as empresas galegas participantes acudiron cunha ampla axenda de actividades e contactos co obxectivo de reforzar as relacións cos seus partners internacionais, establecer novos contactos dentro dun sector completamente globalizado, e acadar novos mercados para os produtos, servizos e contidos galegos, o cal demostra a clara vocación internacional da industria galega vinculada ás novas tecnoloxías das telecomunicacións e do audiovisual