Presentado O Capital da Cultura. Unha achega ás industrias culturais de Galicia

O conselleiro de Cultura e Turismo, Roberto Varela, presentou no Centro de Estudios Caixa Galicia o libro O Capital da Cultura. Unha achega ás industrias culturais de Galicia, coordinado por Víctor Freixanes e Alberto Meixide. Varela salientou que “a existencia dunha industria cultural potente, rendible e de calidade só é posible nun marco comercial rigoroso, no que a sostenibilidade da produción cultural ten que ter o seu asento básico no mercado”.

Segundo o conselleiro, “é imprescindible ter sempre en conta a perspectiva económica da cultura dende o punto de vista da xestión, debido a que o renacer dunha cultura e a fortaleza dunha lingua resultan imposibles se, no canto de concibir como un investimento os recursos que lle son atribuídos, acabamos por velos como un gasto”. Para Varela, o investimento en cultura ten que facerse como se fai na sanidade, na educación ou nas infraestruturas, “dentro dunha concepción integral e equilibrada do progreso”.

O conselleiro amosouse preocupado por aquelas industrias culturais que, como é o caso da produción de libros, “están mergulladas nunha profunda reestruturación dos mercados e dos soportes que os asisten”. Para Roberto Varela, poucas dúbidas poden cabernos de que “a relación entre produtores e consumidores de cultura marca unha pauta de orientación imprescindible para a creación de políticas culturais complementarias que se financian con recursos públicos”.

O titular de Cultura quixo destacar, así mesmo, a importancia que teñen as grandes infraestruturas destinadas “a potenciar a calidade da produción cultural, a demanda de producións de gran envergadura e o consumo de creacións e útiles que non caben nos parámetros da demanda privada ou das actividades ordinarias”. Nese sentido, o conselleiro gabou o proxecto da Cidade da Cultura, que será “o grande motor cultural que Galicia necesita, produtora de efectos que deben estenderse axiña por toda a comunidade”.

“Galicia está na xusta situación na que as industrias culturais teñen amplísima repercusión e profundo sentido, e bastaría botar unha ollada ao noso arredor para ver o importante que foi no noso país o desenvolvemento da industria audiovisual, a industria editorial, a produción musical e fonográfica, o Ano Santo, e todo o que ten que ver co noso patrimonio cultural material e inmaterial, e canto en torno del se move”, engadiu Roberto Varela. O conselleiro rematou a súa intervención louvando “a oportunidade” do libro O Capital da Cultura e a súa “abundante e rigorosa información”.