O Museo Provincial acolle a mostra sobre o actor Enrique Muíño no marco da 32ª Semana de Cine

O vicepresidente da Deputación, o nacionalista Antón Bao, asistiu ao acto de inauguración da exposición sobre Enrique Muíño que se mostra no Museo de Lugo, con motivo da celebración da XXXII Semana de Cine de Autor, que se celebra en Lugo dende o 26 de setembro e ata o día 2 de outubro. Ademais de Antón Bao, tamén asistiron ao acto Aurelia Balseiro, directora do Museo de Lugo, Xulio Xiz Ramil, presidente do Grupo Fonmiñá (organizador da Semana de Cine), Nuria Mundiña, concelleira de Cultura de Lugo, Federico Santillana, director da película sobre Enrique Muíño, Manuel Curiel, directivo do Grupo Fonmiñá, e José Carlos Rodríguez Andina, xefe territorial de Cultura da Xunta.

Na súa intervención, o vicepresidente da Deputación salientou o traballo do grupo Fonmiñá “xa que sen eles non sería posible a celebración desta Semana de Cine, sen a que á súa vez non poderíamos gozar da satisfacción que supón manter vivo o recordo de Enrique Muíño”. Manifestou o seu agradecemento á organización, e subliñou a importancia que ten para os galegos e galegas “que se saquen á luz personaxes históricos galegos que, de non ser por isto, quedarían no esquecemento colectivo”. Declarou así que “a Semana do Cine vai mas alá do cine, xa que ten moita importancia no que se refire á historia, e á recuperación da mesma a través da sétima arte”.