Colexio de Xornalistas lamenta o peche de Televigo

O peche de Televigo dá continuidade a outras medidas similares adoptadas
por empresas televisivas que traballaban no eido do local. Afecta, polo
tanto, á información máis próxima ao cidadán, que está a ser unha das máis
prexudicadas pola crise económica.

A Xunta de Goberno do CPXG solidarízase cos traballadores afectados polo
peche de Televigo, nomeadamente ao coñecer que non teñen información sobre o seu futuro por parte da empresa, e ponse á súa disposición.

O Colexio de Xornalistas chama a atención sobre o proceso que está a vivir
o sistema informativo galego, que deriva nunha redución da pluralidade,
polo peche de medios, e tamén nunha menor independencia dos que quedan, porque as empresas que resisten son máis vulnerables ás presións de administracións e de empresas dada a súa maior febleza económica.