O I Mumi de Verín presenta o seu programa de conexión musical entre Portugal e Galicia

A organización do MUMI Verín’20, I Encontro Profesional de Música Galicia-Portugal, anunciou hoxe o calendario completo das actividades que desenvolverá nesta vila ourensá do 12 ao 14 deste mes e para a que conta co apoio do programa da Xunta de Galicia O teu Xacobeo, promovido pola Consellería de Cultura e Turismo.

O director da Axencia Galega das Industrias Culturais (Agadic), Jacobo Sutil, participou hoxe nesta presentación xunto a Diego Lourenzo e Emilia Somoza, tenente de alcalde e concelleira de Cultura do Concello de Verín; Ana Villarino, deputada de Turismo da Deputación Provincial de Ourense e os representantes da organización do encontro: Emi Candal, de Urdime SCG, e Inés Portela, de Madapro, pola banda galega, e José Costa, de Banzé, pola portuguesa.

Dinamización cultural cara o 2021

Sutil destacou a rapidez coa que esta primeira edición do evento concitou unha importante resposta tanto en número de inscricións profesionais, que nestes momentos sobrepasa xa o centenar, como en artistas interesados en participar, superando as primeiras previsións arredor do MUMI e confirmándoo como unha das citas claves de O teu Xacobeo, o programa da Xunta para impulsar a dinamización cultural en Galicia coa ollada posta na celebración do vindeiro Ano Santo.

O responsable da Agadic enmarcou este I Encontro Profesional de Música Galicia-Portugal no traballo conxunto que se está a levar a cabo desde ambas as beiras do Miño a través de diferentes iniciativas que fomentan a conexión cultural co país veciño e contan, así mesmo, coa implicación da Consellería de Cultura e Turismo, como é o caso de Nortear, o festival Cantos na Maré ou o programa teatral transfronteirizo Nós, coa participación directa do Centro Dramático Galego, entre outros.

En canto ao MUMI, subliñou o interese das súas propostas para os profesionais acreditados, como as seis palestras sobre asuntos que lles afectan directamente aos integrantes da industria musical (festivais, fórmulas de apoio á música, asociacionismo, oportunidades de financiamento á produción, contratación internacional e salas de concertos), as reunións personalizadas ou os showcases de Magín Blanco e A Banda das Apertas, Luca Argel, Silvia Penide, Ezetaerre, Barry White Gone Wrong, Xacobe Martínez Antelo Trío e Oîma.

Unha parte da programación ábrese, así mesmo, ao público xeral de xeito gratuíto, comezando polo concerto de benvida, que dará comezo o xoves 12, ás 19,30 h. coa cantante galega Uxía e o portugués Rui David como anfitrións dun espectáculo no que tamén actuarán Nastasia Zürcher, Dios Ke Te Krew e Dealema.

Ademais, tanto o xoves como o venres, as últimas citas musicais da xornada compartiranse cos espectadores que así o desexen, previa retirada dos convites no despacho de billetes do Auditorio Municipal, tanto para as actuacións neste espazo como para as da Casa da Cultura, e de entrada libre para as que terán lugar en diferentes bares de Verín. Os galegos Familia Caamagno, Pálida e Os D’Abaixo mais os portugueses Cassete Pirata, Bad Legs e Spicy Noodles completan este cartel, que inclúe así mesmo animación e música e danza tradicionais nas rúas.