A Axencia Galega de Emerxencias adquire un novo helicóptero

De forma provisional, o helicóptero terá a súa base no Aeroporto de Santiago xa que está previsto que a definitiva se emprace na Academia Galega de Seguridade Pública da Estrada. A AXEGA investirá un total de 12 millóns de euros durante os vindeiros catro anos no servizo aéreo de rescate de Galicia, do que xa forman parte, ademais do novo aparato, os H-3, con base en Santiago, e H-4, situado no Hospital Cristal Piñor de Ourense.

O carácter polivalente do novo aparato garante a súa versatilidade e, polo tanto, a súa capacidade de adaptación a calquera tipo de emerxencia. Este helicóptero, un Eurocopter biturbina dotado con tecnoloxía punteira, está preparado para o rescate e busca de persoas, o apoio, mando e control dos organismos de intervención en emerxencias e catástrofes, recoñecementos do territorio e transporte de material e persoas. Está, ademais, capacitado para ser medicalizado, polo que se fose necesario podería participar tamén no traslado de feridos e pacientes, como fan na actualidade o H-3 e H-4.

O helicóptero, que dispón dunha autonomía de voo superior ás tres horas e unha velocidade de cruceiro de 180 quilómetros á hora, está dotado cunha grúa de 50 metros de lonxitude e dúas velocidades: unha rápida para reducir os tempos no rescate e unha lenta, se o que se pretende é acadar unha maior precisión. Esta grúa poderá levantar, con arnés ou en padiola, a dúas persoas, pois resiste ata 200 quilogramos de peso. Ademais, ten un gancho de carga co que non se pode rescatar a persoas, pero que si permite o transporte de materiais, por exemplo, un Bambi Bucket moi útil para a intervención en incendios forestais ou elementos para a recollida de animais atrapados nalgún lugar de difícil acceso. O helicóptero conta tamén cun sistema de megafonía e sinais acústicos que se porían en marcha no caso de catástrofes co fin de manter alertada á poboación.

No apartado de comunicacións, o aparato está dotado de tecnoloxía GPS, telefonía móbil e radio trunking e VHF, que permitirán ao persoal de cabina manter un contacto permanente no só co Centro de Atención ás Emerxencias 112 Galicia, senón tamén con outros helicópteros que estean participando no operativo e cos organismos de intervención que estean traballando ao pé da emerxencia. Isto repercutirá positivamente na coordinación, xestión e planificación da resposta ás emerxencias.

Neste helicóptero poderán viaxar un total de 6 pasaxeiros, entre os que se contan o piloto e, cando sexa necesario, un operador de grúa. A composición do equipo de rescate poderá variar segundo as necesidades de cada emerxencia. O aparato ten capacidade para soportar un total de 2.600 quilogramos de peso e dispón dun tren de aterraxe ríxido con forma de esquí, o que lle permitirá tomar terra en calquera tipo de firme e incluso realizar apoios parciais.

Ademais, as súas dimensións reducidas e o seu carácter ergonómico garanten a súa adaptabilidade ás condicións orográficas de Galicia. Igualmente, o novo helicóptero conta co material de rescate necesario para a primeira asistencia sanitaria, isto é, padiolas ríxidas, inmobilizadores, collarines, félulas e colchóns de baleiro.

O sistema de arranque automático do que dispón este apartado asegura que o despegue se faga cinco minutos despois da recepción da alerta. Con este helicóptero está previsto que a maior parte do territorio galego estea cuberto nun tempo medio de 15 minutos e, en menos de media hora, os puntos máis afastados da Comunidade como, por exemplo, Ribadeo, A Mezquita ou A Garda. Este vehículo estará operativo de orto a ocaso os 365 días do ano.

Os helicópteros polivalentes do 112 Galicia que xa operan desde as bases de Santiago de Compostela e Ourense realizaron durante o pasado ano un total de 548 servizos nos que empregaron 479,84 horas de voo. A maior parte das súas saídas estiveron relacionadas con traslados sanitarios primarios (desde o lugar do accidente ou situación do paciente ata os hospitais de referencia), seguidos dos secundarios (entre dous centros hospitalarios), busca de persoas, simulacros e operativos de Protección Civil.