Ibercom 2013 reúne en la Facultad de Ciencias de la Comunicación de Santiago a más de 700 expertos en el ámbito iberoamericano

Nota de prensa remitida por el Gabinete de Comunicación de la USC e Ibercom2013:

A Facultade de Ciencias da Comunicación da USC abreu as súas portas ao XIII Congreso Internacional Ibercom que ata o día 31 de maio se desenvolve baixo o lema "Comunicación, cultura e esferas de poder" e coa participación de máis de 700 investigadores. O reitor Juan Casares presidiu a inauguración do encontro no que tamén interviron o secretario xeral de Universidades, Xosé Alberto Díez de Castro; o reitor da Universidade de Vigo, Salustiano Mato; o vicerreitor da Universidade da Coruña, Julio Abalde; a presidenta da Asociación Galega de Investigadores e Investigadoras en Comunicación (Agacom), Margarita Ledo; e a presidenta de AssIBERCOM, Inmacolata Vasallo.

Logo da apertura oficial do encontro, Clemencia Rodríguez, profesora da Universidade de Oklahoma (USA), analizou a importancia dos medios de comunicación nos movementos e cambios sociais como a recente Primavera Árabe. Clemencia Rodríguez está especializada na análise de comunicación alternativa, comunitaria e cidadá na que traballa dende hai máis de tres décadas.

O programa do congreso comezou cunha xuntanza da Asociación Latinoamericana de Investigadores de Comunicación (ALAIC), da Asociación Galega de Investigadores e Investigadoras da Comunicación e do Nordic Centre for Media and Communication Research, NORDICOM. Pola tarde, o profesor Miquel de Moragas coordina un panel dedicado á definición dunha axenda Iberoamericana –científica e política- de cooperación con AIECS/AIMCR.

A xornada do xoves 30 iniciouse cunha sesión plenaria sobre ‘Comunicación, servizo público e esferas de poder’, coordinada polo profesor da Complutense de Madrid, Enrique Bustamante, e continúa con segunda sesión do día dedicada a ‘Comunicación, procesos de cidadanía e esferas de poder’. A importancia dos medios de comunicación para a democracia e os cambios sociais é o eixo temático dos debates que se abordarán estes días en Ibercom, evento promovido por Agacom e organizado por unha comisión que, baixo a presidencia da catedrática Margarita Ledo, integra a profesores das tres universidades galegas.

Máis información en: http://www.estudosaudiovisuais.org/lusofonia/?lang=es

https://www.facebook.com/Ibercom2013?fref=ts