Las películas ganadoras y finalistas en la última edición de los Premios Mestre Mateo, en el CGAI

Nota de prensa remitida por el Gabinete de Comunicación de la Xunta de Galicia:

A Consellería de Cultura, Educación e Ordenación Universitaria programa ata o venres 16 de maio no Centro Galego de Artes da Imaxe (CGAI-Filmoteca de Galicia) un ciclo dedicado aos XII Premios Mestre Mateo e organizado en colaboración coa Academia Galega do Audiovisual, durante o que se proxectarán un total de seis títulos gañadores e finalistas na última edición dos galardóns do audiovisual galego.

Un ano máis a sede coruñesa do CGAI acolle este programa especial, que na súa nova entrega ofrece ao público galego a oportunidade de ver ‘Somos gente honrada’, produción galardoada como mellor longametraxe; ‘3-1=0’ e ‘Aqua’, gañadoras nas categorías de curtametraxe en imaxe real e animación, respectivamente; e as longas finalistas ‘El árbol magnético’, ‘Inevitable’ e ‘9 ondas’.

Esta carteleira desenvolverase ao longo de catro sesións, de entrada gratuíta, que serán introducidas polos propios directores e/o produtores dos filmes. Así, o ciclo dará comezo mañá martes 13 coa curtametraxe en imaxe real premiada nesta edición, ‘3-1=0’, de Juan Galiñanes e Olga Osorio en coprodución con Píxel Films. Os dous primeiros serán os encargados de presentar a fita, protagonizada por Deborah Vukusic e Xosé Barato e dirixida polo propio Galiñanes.

‘3-1=0’ comparte cartel nesta primeira xornada con ‘El árbol magnético’, unha das longas finalistas. A primeira longametraxe da directora Isabel Ayguavives é unha coprodución hispano-chilena, que se estrea agora en Galicia tras o seu paso polo Festival de Cine de San Sebastián, entre outros certames.

Na sesión do mércores 14 proxectarase ‘Aqua’, a curtametraxe da produtora Algarabía gañadora na categoría de animación, así como outra das finalistas: ‘Inevitable’, de Adivina Producciones. Nesta ocasión, contarase coa presenza de Virginia Curia e Tomás Conde para a falar da súa obra, unha peza en ‘stop-motion’ realizada con motivo do Día Mundial do Medio Ambiente. Pola súa banda, Jorge Algora e Susana Maceiras presentarán ‘Inevitable’, un thriller emocional ambientado na Arxentina dos anos oitenta e interpretado por un reparto internacional encabezado por Darío Grandinetti, Antonella Costa, Federico Luppi e Mabel Rivera.

‘Somos gente honrada’, do director Alejandro Marzoa, centrará a terceira das citas do ciclo o vindeiro xoves día 15 como fita gañadora do premio Mestre Mateo á mellor longametraxe. Os responsables da compañía galega Vaca Films, coprodutora do filme xunto a El Terrat, compartirán co público algunhas das claves da súa produción nesta nova oportunidade de ver en pantalla grande a comedia que protagonizan Miguel de Lira e Paco Tous.

O programa pecharase o venres 16 con ‘9 ondas’, do realizador Simone Saibene e finalista na categoría de mellor longametraxe. O seu director, quen tamén é produtor xunto a Elcercano.com, estará na Coruña para presentar o filme protagonizado por Dario Merlini e María Tasende, coa cidade de Ourense como escenario principal.

Todas as sesións do ciclo dedicado aos XII Premios Mestre Mateo darán comezo ás 20.30 horas, agás esta última, que terá lugar ás 18.00 horas.

Nesta semana en que se celebra o Día das Letras Galegas, a programación do CGAI completarase coa proxección o venres 16, ás 20.30 horas, de ‘Proxecto Nimbos’, filme arredor do poeta Xosé María Díaz Castro.

A fita é o resultado dunha iniciativa impulsada polo colectivo de críticos e programadores Acto de Primavera, que propuxo a diferentes cineastas galegos a realización dunha peza curta, de entre 1 e 5 minutos, inspirada por un poema do libro ‘Nimbos’. Máis de trinta directores e directoras responderon a este convite e no CGAI exhibiranse algunhas das primeiras pezas deste proxecto colectivo.

A programación completa pode consultarse na web www.cgai.org